Lood

My hart voel  sinker swaar

En uiteindelik maak dit sin

toe U die lood vir my wys

Stukke ingemessel deur tyd

koud en grys

met sagte weefsel tussenin

eers tóé kon ek toelaat

(en  eintlik teen my sin)

dat u dit saggies uitsny -

Oorgee

en kyk hoe U dit smelt

in die vuur van dit

wat U vir my Ly

Soos ‘n ystersmid wat delf

in my hart

Totdat  dit  vorm aanneem  

en U die wording van ‘n

SKILD  vir my wys

Loodswaar vat U die seer

 en vorm so my verweer

Teen dit wat ek nie kan sien

 of van weet nie

Radioaktiwiteit - wat my wil vernietig

Soos golwe wat my binneste indring

En dit wat ek  glo, kom verwring

Sonder my besef of dink of voel...

U verander hierdie swaar-hart-lood se doel

U beskerm my

Met dit wat my hart wou vergiftig

Bou U oor tyd ‘n die sterkste skans

En ek kan rus in die wete

dat die gewig in my hart

Deel kan wees van my beskerming

U kán die lood in my hart  gebruik

Dit is eintlik U ontferming.